Novas
Bases do Premio de Xornalismo Cívico Alfredo Vicenti 2022
- Compartir
1º Poderán concorrer ao Premio de Xornalismo Alfredo Vicenti do Ateneo de Santiago traballos de calquera xénero periodístico en calquera dos soportes tradicionais ou dixitais que contribúan a promover un debate cívico sobre asuntos de interese social, favorecendo o espazo público para mellorar a calidade de vida dos cidadáns.
2º Poderán participar no Premio as persoas físicas que sexan autoras dos traballos presentados e teñan o xornalismo como principal medio de vida. Os traballos tamén poderán ser propostos, co consentimento do autor ou autores, polos medios nos que foron publicados ou polos/as socios/as do Ateneo de Santiago.
3º Os autores deberán estar debidamente identificadosa través do formulario que se adxunta nas bases e os traballos deberán cumprir os seguintes requisitos:
- Abordar temas de interese cívico ou cidadán e estar publicados ou difundidos entre o 1 de novembro de 2021 e o 31 de outubro de 2022.
- Os traballos impresos ou publicacións dixitais deberán estar redactados en galego ou castelán.
- Os traballos audiovisuais deberán incluír narracións ou diálogos en calquera dos dous idiomas: galego ou castelán.
4º A presentación ou proposta dos traballos deberá realizarse por correo postal á sede do Ateneo de Santiago, Praza de Salvador Parga, 4-2º, 15704 Santiago de Compostela, especificando no exterior do sobre o nome do premio.
5º Os traballos publicados en papel presentaranse no soporte orixinal da publicación ou fotocopia compulsada do mesmo; para traballos difundidos nun medio dixital, remitirase unha copia en formato Din A-4, indicando claramente a URL de acceso on line ao traballo; os vídeos presentaranse en formato DVD-video ou AVI; as gravacións radiofónicas presentaranse en formato MP3.
En todos os casos os traballos presentados virán acompañados do formulario que se deberá cumprimentar.
6º O prazo de presentación dos traballos terminará ás 20 horas do día 31 de outubro de 2022, aceptándose os que teñan sido selados e franqueados con anterioridade a esa data.
7º Non poderán presentarse máis de tres traballos por autor.
8º O fallo do premio darase a coñecer o 20 de Novembro de 2022 (aniversario do nacemento de Alfredo Vicenti) nun acto público do Ateneo de Santiago.
9º O Premio Alfredo Vicenti do Ateneo de Santiago estará dotado con 1.000 € e un recordo conmemorativo. Os finalistas comprométense a estar inescusablemente presentes no acto de entrega; de non facelo enténdese que renuncian ao premio.
10º O xurado estará presidido polo presidente do Ateneo de Santiago, ou persoa en quen delegue; un representante dunha Organización Profesional de Xornalistas; o Decano da Facultade de Ciencias da Comunicación da USC; ata dous representantes das institucións patrocinadoras do mesmo; un representante da Sección de Sociedade da Información do Ateneo; o gañador/a da última edición do premio e o secretario do Ateneo de Santiago, que levantará a acta da sesión e actuará con voz pero sen voto.
11º O traballo premiado pasará á disposición do Ateneo de Santiago, que poderá editalo ou divulgalo sen xerar dereitos de autor.
12º Non se premiará ningún traballo xa galardoado noutras convocatorias de premios.
13º O fallo do xurado será inapelable.
14º A participación nestes premios supón a aceptación das presentes BASES e o seu cumprimento. Estas poden ser consultadas na web: www.ateneodesantiago.gal.
