Exposición «Traxes e cores de Galiza. A identidade nacional na plástica de Castelao»

No contexto do Ano Castelao 2025, o Pazo de Fonseca acolle ata o 30 de agosto a exposición «Traxes e cores de Galiza. A identidade nacional na plástica de Castelao», que amosa a rica e importante presenza da indumentaria tradicional na obra pictórica e gráfica de Alfonso Daniel Rodríguez Castelao. 

Máis de 50 manequíns recubertos en liño do país, con base de madeira e brazos articulados, mostran reproducións fidedignas de traxes tradicionais galegos que aparecen nos óleos, acuarelas, gravados e bosquexos de Castelao. Cada manequín vai acompañado de utensilios e antigüidades para completar a escena a representar.

A exposición conta tamén con reproducións da obra gráfica de Castelao en diferentes formatos e tamaños, ourivería tradicional, paneis con información das obras expostas e dos traxes amosados, vitrinas con material gráfico e documental relacionado coas pezas do corpus expositivo, así como un audiovisual para a proxección na sala.