Visita guiada á exposición «Fe. Tino Martínez 1971-2016»
- Data
- Sábado, 16 de outubro de 2021
- Horario
- 12.00h
- Lugar
- Museo das Peregrinacións
O sábado, 16 de outubro, ás 12.00h o Ateneo de Santiago realizará unha visita gratuíta á exposición do Museo das Peregrinacións «Fe. Tino Martínez 1971-2016», guiada polo seu autor Tino Martínez.
As prazas son limitadas polo que todo aquel que queira participar deberá inscribirse no enderezo ateneo@ateneodesantiago.gal, tendo preferencia de admisión os/as socios/as do Ateneo. A data límite para anotarse é o xoves, 14 de outubro.
Esta mostra ten como finalidade realizar unha retrospectiva do traballo do fotógrafo Tino Martínez entre 1971 e 2016, centrándose na serie de celebracións relixiosas populares de Galicia, as romarías. A romaría son dúas metades dun mesmo corpo que se complementan. Por unha banda, o sagrado, no que as persoas achegan a súa devoción e ofrendas á divindade, e, pola outra, a profana, máis relacionada co festivo. A realidade destes actos é complexa e diversa, non estanca, conformándose así un fondo común que nos ilustra sobre a heteroxeneidade das situacións e xentes das romaxes galegas. Deste xeito, Tino Martínez móstranos nesta exposición fotografías capturadas no Nazareno da Pobra do Caramiñal, os Milagres de Amil ou o Corpiño, entre outras.
Tino Martínez (Santiago de Compostela, 1943) decidiu dedicarse á fotografía con 20 anos e comezou en serio nela con 25 e sen cámara propia. Esta é só unha circunstancia que amosa como os anos foron modelando un profesional autodidacta de férrea disciplina. El preferiu sempre traballar directamente co cliente, a partir de 1988 dende o seu estudo na rúa Nova, para facer avanzar a súa particular mirada. Ademais da súa amada cidade natal, os repertorios máis recoñecidos del son as series de celebracións relixiosas populares que abranguen medio século de historia.