Ateneo Inquedo - Sionlla Biotech. Que oportunidades se presentan na área de Santiago?

O xoves, 27 de outubro, ás 19.00h o Ateneo de Santiago ten programada no Salón de Actos Isaac Díaz Pardo unha nova actividade do Ateneo Inquedo, organizada pola Sección Ciencia, Tecnoloxía e Medio Ambiente, titulada «Sionlla Biotech. Que oportunidades se presentan na área de Santiago?». No acto, que estará conducido por Álvaro Silva, Director de Produción e Proxectos en Oxidine Water Technology, participarán:

• Carme Pampín, Presidenta do Clúster Bioga
• Carme Casado, Conselleira Delegada de UNINOVA
• José Alborés, Presidente da Asociación de Empresarios do Tambre

Dende hai varios anos, Galicia é un gran polo xerador de coñecemento en biotecnoloxía a nivel español. Particularmente, a área de Compostela, aglutinante de boa parte do capital intelectual neste ámbito xerado no noroeste ibérico, caracterizouse por concentrar a maioría da investigación e iniciativa emprendedora da contorna bio. Conscientes disto, dende a Asociación de Empresarios do Tambre e en conxunción co Concello e a Universidade de Santiago, a través de UNINOVA, co apoio da Xunta de Galicia, están impulsando o Biopolo Tecnolóxico da Sionlla. Numerosos titulares na prensa autonómica ocuparon esta iniciativa que se atopa en alto grao de execución da obra pero, cal é o obxectivo e que se pretende conseguir coa súa actividade? Os poñentes convidados polo Ateneo axudarannos a vislumbrar o que conleva no medio e longo prazo a posta en funcionamento desta gran iniciativa.