Conferencia «A economía do hidróxeno: mitos e realidades dun futuro certo» de Luis Miguel Varela
- Data
- Luns, 13 de febreiro de 2023
- Horario
- 20.00h
- Lugar
- Rúa do Vilar, 19, Santiago de Compostela
- Máis información
Acceso libre ata completar a capacidade da sala
O luns, 13 de febreiro, ás 20h o Ateneo de Santiago ten programada na Rúa do Vilar, 19, de Santiago de Compostela unha conferencia titulada «A economía do hidróxeno: mitos e realidades dun futuro certo», que estará impartida por Luis Miguel Varela, Catedrático de Física da USC.
Luis Miguel Varela licenciouse en Física pola Universidade de Santiago e en Dereito pola Universidad Nacional de Educación a Distancia (UNED). Doutorouse en Ciencias Físicas (con premio extraordinario) pola Universidade de Santiago de Compostela, onde actualmente é catedrático do seu departamento de Física de Partículas (Área de Física da Materia Condensada) e ten sido Decano da Facultade de Física entre 2010 e 2018. A súa docencia céntrase en termodinámica, mecánica estatística, análise de datos estatísticos, Econofísica e Termodinámica de Enerxías Renovables mentres que as súas investigacións se ocupan da mecánica estatística de sistemas complexos, especialmente fluídos cargados complexos, e máis especificamente en líquidos iónicos, e en redes complexas e as súas aplicacións en epidemias, sistemas socioeconómicos, desenvolvemento interrexional, etc. En concreto, traballa nas propiedades de fluídos iónicos e ionoxeles como electrolitos avanzados para o almacenamento de enerxía electroquímica e eléctrica (baterías, supercondensadores, pilas de combustible, membranas de electrolizadores…) e tamén como medios activos en dispositivos fotónicos. Realizou contribucións no campo do almacenamento de enerxía térmica e dos fluídos térmicos e é inventor de varias patentes no campo dos dispositivos de captación de enerxía e materiais para aplicacións enerxéticas. Autor ou coautor de máis de 140 artigos, capítulos e monografías nestes campos, con máis de 120 comunicacións a congresos, dirixiu 10 teses doutorais e máis de corenta teses de grao e máster e coordinou proxectos rexionais, nacionais e europeos, contratos de investigación con industrias e coa Administración Pública, os programas de Máster en Física e Máster en Enerxías Renovables e Sustentabilidade Enerxética da USC e o programa de Doutoramento en Enerxías Renovables e Sustentabilidade Enerxética. Tamén coordinou a rede galega de Líquidos Iónicos e é presidente fundador da Sociedade Europea de Materia Iónica (www.web-esim.eu), que integra a máis de 60 investigadores de diferentes Universidades e Centros de investigación nacionais e europeos. Actualmente coordina o Grupo de Nanomateriais, Fotónica e Materia Branda da USC e é membro das principais plataformas europeas sobre baterías (Batteries Europe, Battery 2030+), asesorando á Xunta de Galicia sobre a estrutura e perspectivas do sector do almacenamento de enerxía. Do mesmo xeito, é fundador do Seminario Permanente de Transición Enerxética e Competitividade Industrial (SPERTUS), que integra especialistas das máis variadas disciplinas (ciencias, enxeñería, economía, dereito, seguridade, cultura e humanidades…) nos diferentes aspectos da captación, almacenamento, transporte de enerxía e eficiencia enerxética, xerente da Asociación Galega do Hidróxeno e vicepresidente da rede Silkway de universidades para as relacións Europa-Asia en materias como a enerxía e o desenvolvemento sustentable, promovida polas Universidades de Milano-Bicocca e Santiago de Compostela e composta por investigadores de universidades europeas e asiáticas.