Proxección da película «El chamoume Malala» de Davis Guggenheim

O venres, 17 de marzo, ás 19.00h o Ateneo de Santiago ten programada na sede de Afundación (Rúa do Vilar, 19, de Santiago de Compostela) a proxección da película «El chamoume Malala» (He named me Malala) de Davis Guggenheim. Esta proxección, comprendida dentro da II Mostra Internacional de Cine e Educación (CINEDUCA), estará presentada e comentada por Juana María Otero, Psicóloga.

El chamoume Malala (He named me Malala)
Director: Davis Guggenheim
Emiratos Árabes, 2015
Un retrato íntimo da activista paquistaní Malala Yousafzai. Ganadora do Premio Nobel da Paz, a persoa máis nova que recibiu tan prestixioso galardón, Malala foi sinalada como obxectivo polos talibáns e sufriu graves feridas por arma de fogo cando regresaba no autobús escolar á súa casa, no Val de Swat (Pakistán). Este ataque provocou a protesta das persoas que a apoiaban en todo o mundo. Milagrosamente sobreviviu e agora, como cofundadora do Fondo Malala, é unha destacada defensora da educación das nenas en todo o mundo.

Juana María Otero Suárez, natural de Santiago de Compostela, é Licenciada en Psicoloxía, especialista en Pedagoxía Terapéutica e Logopedia. Foi Xefa da Sección de Educación Especial na Consellería de Educación da Xunta de Galicia, profesora de Educación Secundaria e mestra de Educación Infantil e Primaria. Os seus intereses son os temas de actualidade relacionados coa psicopedagoxía e mellora da comprensión da lectura así como benestar, saúde e prevención de problemas de saúde mental.

Esta actividade enmárcase no programa Cultura por alimentos de Afundación, a Obra Social ABANCA, en colaboración coa Federación Española de Bancos de Alimentos, co obxectivo de contribuír, a través de doazóns, a incrementar os recursos dos Bancos de Alimentos de Galicia. Convidamos a todos os asistentes a colaborar con esta campaña solidaria mediante a doazón de alimentos non perecedoiros, os cales se poderán depositar na entrada da sede da Rúa do Vilar.