Presentación da novela «70º Norte» de Xaime Toxo

Data
Mércores, 24 de xaneiro de 2024
Horario
19.30h
Lugar
Rúa do Vilar, 19, Santiago de Compostela
Máis información

Acceso libre ata completar a capacidade da sala

Compartir

O mércores, 24 de xaneiro, ás 19.30h, terá lugar na Rúa do Vilar, 19, de Santiago de Compostela, a presentación da novela «70º Norte» de Xaime Toxo. No acto participarán:
   - Pilar Sampedro, Secretaria do Ateneo de Santiago
   - Xaime Toxo, escritor e Presidente do Ateneo de Pontevedra, autor da obra

70º Norte é a primeira novela de Xaime Toxo. Nela relata un colapso social nas grandes áreas metropolitanas indiferentes ao que non sexa o seu propio ritmo desaforado de desenvolvemento. Unha praga contaxiosa con matices de maldición bíblica, leva á civilización postindustrial aos límites da desaparición. No medio dunha extinción, sen conciencia do perigo, un pequeno grupo intúe que o paradoxo da salvación radica nas persoas que permaneceron illadas nos remotos contornos dunha natureza tan implacable como imprescindible. A Colonia é como denominan o campamento nómade onde viven. Moverse cara ao norte non é unha opción, senón unha condición de supervivencia. A miles de quilómetros do ruído das urbes, o destino da especie humana está en saberse unha parte máis do planeta que habita.

Xaime Toxo (Bueu, 1955), licenciado en Filosofía e Ciencias da Educación, é mestre especialista en atención escolar a alumnos con cegueira e discapacidade visual. Xestor cultural, foi fundador da Asociación Liboreiro de Bueu en 1974 e actualmente é presidente do Ateneo de Pontevedra. No seu haber como escritor conta, entre outras publicacións, cos libros de relatos As palabras que move o mar (2015) e Protexer o invisible (2016), e os textos poéticos Cadernos do mar (I e II, 2014), en colaboración co pintor Antón Sobral, e A casa sen nós (2019). Recibiu o Primeiro Premio do Certame «O xadrez faise palabra», convocado pola ONCE no ano 2000; accésit do Premio Modesto R. Figueiredo 2002; primeiro Premio do Certame de relatos do Concello de Paradela 2002; primeiro Premio do Certame Manuel Murguía de narracións breves 2004; accésit do Premio Modesto R. Figueiredo 2011 e accésit no Certame Manuel Murguía 2011. 

Próximos eventos Ver axenda