Conferencia «Máis alá do petróleo: o futuro dos combustibles renovables» de Jacobo Porteiro

O luns, 5 de maio, ás 19.30h o Ateneo de Santiago ten programada na Rúa do Vilar, 19, de Santiago de Compostela, unha conferencia titulada «Máis alá do petróleo: o futuro dos combustibles renovables», que estará impartida por Jacobo Porteiro, investigador do Grupo de Tecnoloxías Enerxéticas (GTE) do Centro de Investigación en Tecnoloxías, Enerxía e Procesos Industriais (CINTECX) da Universidade de Vigo.

A sociedade actual continúa fortemente dependente do petróleo, unha realidade que entra en conflito cos compromisos globais de loita contra o cambio climático e coa necesidade urxente de avanzar cara a un futuro descarbonizado. Nesta ponencia abordarase o contexto internacional dos acordos climáticos e os obxectivos de neutralidade en carbono, analizando o papel que poden desempeñar os combustibles renovables nesta transición. Presentaranse os principais combustibles alternativos —biocombustibles, hidróxeno verde, biogás, entre outros—, destacando as súas vantaxes e limitacións dende unha perspectiva técnica, ambiental e económica. Finalmente, exporase o impacto que esta transformación enerxética pode ter en sectores estratéxicos de Galicia, como o forestal, o agroalimentario, o naval ou o transporte, e identificaranse as oportunidades que se abren para o desenvolvemento sostible e a innovación no territorio galego.

Jacobo Porteiro Fresco (Vigo, 1976) é catedrático na área de Máquinas e Motores Térmicos na Escola de Enxeñaría Industrial da Universidade de Vigo, onde tamén é investigador principal do Grupo de Tecnoloxías Enerxéticas (GTE) dentro do centro CINTECX (Centro de Investigación en Tecnoloxías, Enerxía e Procesos Industriais). A súa traxectoria investigadora céntrase na enxeñaría térmica, con especial atención á combustión, á eficiencia enerxética, á modelización CFD (dinámica de fluídos computacional) e ás enerxías renovables. Ten liderado e participado en numerosos proxectos de I+D, incluíndo iniciativas sobre combustibles renovables, redución de emisións e economía circular na industria e no transporte. No eido científico, dirixiu 11 teses de doutoramento e conta cunha ampla produción científica, con máis de 130 publicacións en revistas científicas de alto impacto, recibindo máis de 6.000 citas e un índice h de 37 segundo Google Scholar. Ademais do seu labor investigador, participa activamente na divulgación científica e na transferencia de coñecemento, así como no asesoramento a empresas e institucións públicas en materia de sustentabilidade e transición enerxética. Dende 2014, representa a España no Comité de Combustión da Axencia Internacional da Enerxía (IEA), comité que presidiu nos anos 2017 e 2018. No ámbito da xestión universitaria, foi subdirector da Escola de Enxeñaría Industrial, director do Departamento de Enxeñaría Mecánica (2012-2018), director da Área de Sustentabilidade (2018-2022) e adxunto ao reitor para a sustentabilidade (2022-2024).