Conferencia «Rompendo as murallas do localismo: Vigo en Santiago» de Manuel Bragado

O luns, 26 de maio, ás 19.30h o Ateneo de Santiago ten programada na Rúa do Vilar, 19, de Santiago de Compostela unha conferencia en colaboración coa Federación de Ateneos de Galicia, titulada «Rompendo as murallas do localismo: Vigo en Santiago», que estará impartida por Manuel Bragado, escritor, editor e profesor.

Manuel Bragado Rodríguez (Vigo, 1959) é editor, mestre e activista cultural. Licenciado en Ciencias da Educación pola USC, traballou en Edicións Xerais de Galicia, empresa da que foi director durante 24 anos (1994-2018). Na actualidade é orientador nos CEIP de Laredo e CEIP de Cedeira de Redondela. É presidente da Fundación Luzes, secretario da asociación Premios da Crítica de Galicia, membro de Nova Escola Galega, da que foi presidente nos anos 80, e do Instituto de Estudios Vigueses. Colaborador de Faro de Vigo dende hai catro décadas, dende 1999 mantén semanalmente a sección de opinión «Campo de Granada», pola que recibiu os premios de xornalismo Gómez Román (2000) e Fernández del Riego (2014). Dende 2005 publica o blog «Brétemas», onde presta especial atención á divulgación da historia e memoria da cidade de Vigo e polo que recibiu os premios AELG, Fervenzas Literarias e Gala do Libro Galego á traxectoria dun proxecto literario na rede (2019). Director de centos de proxectos de libros educativos e autor de diversos estudos sobre a edición e a lectura, ten publicados, entre outros, os libros Vigo, puro milagre (2019) e Vigo, abella da ribeira (2023), onde escolma algunhas das súas prosas viguesas.