Debate sobre «El cordero carnívoro» de Agustín Gómez Arcos

Os martes, 24 de febreiro e 10 de marzo, ás 17.30h no Salón de Actos Isaac Díaz Pardo do Ateneo de Santiago (Pr. Salvador Parga, 4, 2º) terán lugar novas sesións do Club de Lectura, onde se comentará a obra El cordero carnívoro de Agustín Gómez Arcos.

El cordero carnívoro narra, dun modo intenso e provocativo, a vida dun rapaz dende o seu nacemento ata que cumpre 25 anos. Partindo da estraña relación entre o protagonista e os seres que o rodean, desvelánse, de maneira descarnada, os traumas causados pola guerra civil nunha familia da burguesía andaluza. Fondas reflexións sobre as relacións humanas, a morte, a homosexualidade, a liberdade, a ditadura, a relixión, conforman esta novela de amor e odio, maxistralmente escrita pero politicamente incorrecta.

Agustín Gómez Arcos nace no seo dunha familia republicana. Aos vinte anos, tras finalizar o bacharelato en Almería, desprázase a Barcelona para estudar Dereito, pero axiña descobre que a súa vocación é a literatura e a súa auténtica paixón, o teatro. A mediados dos anos 50 trasládase a Madrid, onde traballa como actor, director de escena e tradutor. O seu labor como dramaturgo é merecedora, en dúas ocasións, do Premio Nacional Lope de Vega pero a censura prohíbe a representación das súas obras. Acosado pola ditadura, decide exiliarse: primeiro en Londres; logo, definitivamente, en París, onde se instala en 1968, dedicándose, dende aquela, ao xénero narrativo. Morre tras publicar catorce novelas en francés, ser galardoado con numerosos premios literarios e condecorado coa Orde das Artes e as Letras francesas con grao de cabaleiro (1985) e de oficial (1995).