Conferencia «Intelixencia artificial: máquinas sen infancia» de Senén Barro

O luns, 25 de maio, ás 20.00h o Ateneo de Santiago ten programada na Rúa do Vilar, 19, de Santiago de Compostela, unha conferencia titulada «Intelixencia artificial: máquinas sen infancia», que estará impartida por Senén Barro, Catedrático de Ciencias da Computación e Intelixencia Artificial e Director científico do CiTIUS.

Senén Barro Ameneiro (As Pontes, 1962) é Doutor en Física (premio extraordinario), Catedrático de Ciencias da Computación e Intelixencia Artificial e Director científico do CiTIUS (Centro Singular de Investigación en Tecnoloxías Intelixentes da Universidade de Santiago de Compostela - USC). Entre 2002 e 2010 foi Reitor da USC, tendo impulsado o perfil investigador, innovador e emprendedor da universidade e desenvolvido o ‘Campus Vida’, recoñecido como Campus de Excelencia Internacional en 2009. Entre 2008 e 2010 foi Vicepresidente da “Conferencia de Rectores de Universidades Españolas” e de 2010 a 2017 Presidente de RedEmprendia (rede de 28 das mellores universidades de 6 países de América Latina, España e Portugal, orientada á transferencia de I+D e emprendemento universitario). Editor ou autor de sete libros e autor de máis de 300 artigos científicos, é socio fundador das spin- off SITUM Technologies e InVerbis e membro da Real Academia Galega de Ciencias. En 2020 obtivo o Premio Nacional de Informática José García Santesmases.