Presentación do libro «Un Tory en España» de Emilio Grandío

O martes, 9 de xuño, ás 19.30h, o Ateneo de Santiago ten programada no Salón de Actos Isaac Díaz Pardo (Praza de Salvador Parga, 4-2º, Santiago de Compostela) a presentación do libro «Un Tory en España» de Emilio Grandío, que estará acompañado por Ramón Villares, Catedrático de Historia Contemporánea da USC, e Pilar Sampedro, Directiva do Ateneo de Santiago.

Un Tory en España realiza un percorrido polo período histórico español entre 1936 e 1941, cando o país se converteu nun escenario clave da política europea, a través dunha figura singular: Archibald James, máis coñecido como Wing Commander James (WCJ), diplomático, militar e un dos principais especialistas británicos na España da Guerra Civil e a inmediata posguerra. A partir dunha investigación baseada en fondos familiares inéditos, diarios persoais e documentación diplomática, facilitados polo fillo de WCJ, Emilio Grandío reconstrúe as sucesivas visitas de WCJ a unha España en guerra e, máis tarde, á España franquista. Dende o Madrid sitiado de 1936 ata o seu nomeamento como primeiro secretario da Embaixada británica en 1940, o libro mostra os xiros da política británica, o abandono do appeasement e a crecente presión do Terceiro Reich. Neste relato persoal aparecerán personaxes como Churchill, De Gaulle, Pétain, Franco, Beigbeder, Aranda, o duque de Windsor, etc., ofrecendo unha mirada dende dentro tanto do funcionamento do réxime de Franco como dos dilemas do conservadorismo británico ante un mundo que se derrubaba. A traxectoria de WCJ serve así de fío condutor para comprender unha etapa marcada pola incerteza, o medo e o nacemento dunha nova orde internacional.

Emilio Grandío Seoane é Catedrático de Historia Contemporánea da Universidade de Santiago de Compostela (G. I. HISPONA). Desenvolveu varias liñas de investigación vinculadas ao estudo da Segunda República, ditadura franquista e Transición democrática. Autor de numerosas monografías e artigos sobre servizos de información durante a Guerra Civil e a Segunda Guerra Mundial, é membro da Rede RESHINT (Red Española de Estudios Históricos de Inteligencia) e investigador principal do Proxecto I+D FIVE, do Ministerio de Ciencia, Innovación e Universidades.