Conferencia «Galicia baixo a sombra da eclipse: ceos Starlight e oportunidade territorial» de Antonia M. Varela Pérez

O luns, 15 de xuño, ás 19.30h o Ateneo de Santiago ten programada na Rúa do Vilar, 19, de Santiago de Compostela, unha conferencia titulada «Galicia baixo a sombra da eclipse: ceos Starlight e oportunidade territorial», que estará impartida pola Astrofísica Antonia M. Varela Pérez, Directora da Fundación Starlight.

Antonia M. Varela Pérez é Doutora en Astrofísica pola Universidade de La Laguna (Tenerife), Directora xerente da Fundación Starlight, Enxeñeira senior no Instituto de Astrofísica de Canarias (IAC) e Directora do Museo da Ciencia e o Cosmos de Tenerife. Realizou a súa tese doutoral no IAC e no Instituto de Astrofísica de París sobre física extragaláctica e dende 1990 forma parte do Grupo de Calidade do Ceo do IAC. Preside a Asociación de Mulleres Empresarias, Directivas e Profesionais de Canarias (BPW Canarias) e é Vicepresidenta de BPW España. Publicou máis de 100 traballos en revistas científicas e en congresos especializados, tendo sido publicada en 2023 na revista Science unha das súas investigaciónes máis destacadas sobre contaminación lumínica e ameazas ao ceo nocturno. Estivo sempre ligada á docencia universitaria, impartindo clases de Física Xeral e de Dinámica Galáctica, e dirixiu teses doutorais e a numerosos bolseiros en formación e estudantes en prácticas, ademais de ter sido profesora de Astronomía da Universidade para Adultos e Maiores da Universidade de La Laguna durante 24 anos e ter organizado e impartido máis de 50 cursos Starlight en España, Canadá, Perú, Arxentina e Colombia. Comunicadora científica, con máis dun milleiro de contribucións de divulgación en foros científicos, medios de comunicación (prensa, radio e televisión) e revistas especializadas, tamén é unha persoa comprometida coa igualdade de xénero, tendo participado en numerosos proxectos e actividades orientados a fomentar vocacións STEM entre nenas e mulleres e formou parte do Grupo de Mulleres Científicas e Tecnólogas de Canarias e da Fundación Women Talent. Foi coordinadora da Comisión do Clima e Calidade do Aire do Observatorio do Cambio Climático do Goberno de Canarias e é membro de numerosas entidades científicas e conservacionistas como a Unión Astronómica Internacional (IAU), a Sociedad Española de Astronomía (SEA), a Asociación de Museos de Ciencia y Técnica de España (AMUCYTE) e a Comisión Nacional del Eclipse (CNE) dentro da Comisión Nacional de Astronomía. Tamén organizou numerosas conferencias e encontros internacionais e recibiu diversas distincións como, entre outros, o Premio á Traxectoria Investigadora do Concello de Santa Cruz de Tenerife (2019), o Premio polo labor na difusión cultural da astronomía, na protección do ceo nocturno e a calidade turística dos territorios do Xeoparque UNESCO de Villuercas-Ibores-Jara (2019), o Premio Mujeres que Mueven la Sociedad (2024) ou a Medalla de Ouro de Canarias (2024), ademais de aparecer na Lista Forbes Women | Las 30 Mujeres Más Influyentes de Canarias 2026.