O Ateneo presenta a nova novela de José Francisco Rodil

Este mércores, 15 de decembro, ás 19.30h, terá lugar no Centro Social Abanca da Praza de Cervantes de Santiago de Compostela a presentación do libro «Los prodigios de Gillingham». O acto será presentado por Pilar Sampedro, Secretaria do Ateneo, e contará coa participación de José Francisco Rodil Lombardía, autor da novela; Roberto Leal, actor que lerá fragmentos da obra; e Cristian Velasco, editor de Velasco Ediciones.

A novela comeza a finais dos anos sesenta no madrileño barrio de Moncloa, onde se instala o inglés William Gillingham, un misterioso estranxeiro que esperta a curiosidade da veciñanza e inflama as fantasías dos máis pequenos. Pasados os anos, Eduardo Poveda, un daqueles nenos, viaxa a Londres e descobre, por casualidade, o rastro de Gillingham. Empeza entón, coa axuda dun xornalista amigo da infancia, unha investigación que os levará por diferentes países e lanzará resultados sorprendentes ao redor de operacións de espionaxe, espolio do patrimonio artístico español e contrabando de obras de arte.

José Francisco Rodil Lombardía é licenciado en Ciencias da Información pola Universidade Complutense de Madrid. Traballou como redactor no diario Informaciones, no departamento de prensa do Ministerio de Administración Territorial, en El Correo Gallego e en Televisión de Galicia. Foi, así mesmo, xefe de control de cadea da CRTVG, director da Voz de Asturias e delegado do Grupo Z en Asturias. Na actualidade, é vocal da Comisión de Garantías da Federación de Asociacións de Xornalistas de España.

Ler en Compostela 24 horas