Hemeroteca

Premio Alfredo Vicenti para un podcast sobre as consecuencias do conflito bélico en Ucraína

‘Historias dun país en guerra’, serie de 35 capítulos da xornalista Nuria López Presedo, impúxose por unanimidade do Xurado

Compartir

 

Este mércores, o Xurado do Premio de Xornalismo Cívico Alfredo Vicenti 2022, galardón organizado polo Ateneo de Santiago, tomou a decisión por unanimidade de outorgar a condecoración desta edición á xornalista Nuria López Presedo polo traballo titulado Historias dun país en guerra, unha serie de podcasts composta por 35 capítulos que foran publicados en Radio Galega Podcast entre o 9 de maio e o 24 de xuño deste ano, ademais de nas plataformas iVoox e Spotify.

Este traballo recolle os relatos reais e as testemuñas de varias vítimas da guerra en Ucraína; cidadáns ucraínos, tanto residentes no país coma outros que se viron na obriga de teren que fuxir del ou que teñen familiares directos que residen alí. Do mesmo xeito, o Xurado decidiu tamén adxudicar un accésit a Miguel Rodríguez Fernández e a Duarte Romero Varela polo traballo Cooperativas de vivenda en cesión de uso: unha alternativa para un fogar asequible?, que foi publicado en Té con gotas o día 12 do pasado mes de xaneiro.

O Xurado, presidido polo vicepresidente do Ateneo de Santiago, Francisco Candela, estivo constituído por José Francisco Rodil, directivo da Asociación de Periodistas de Compostela; Xosé Ramón Pousa, exdecano da Facultade de Ciencias da Comunicación da USC; Mercedes Rosón, concelleira responsable de Acción Cultural do Concello; Antón Porteiro, membro da Sección Sociedade da Información do Ateneo de Santiago; e Manuel Varela Fariña, quen foi galardoado na pasada edición deste premio.

A entrega do Premio, dotado coa cuantía de 1.000 euros e unha peza conmemorativa, así coma dun accésit consistente nun agasallo especial, terán lugar nun acto público na capital galega que se desenvolverá no vindeiro mes de Nadal.

Ler en El Correo Gallego

Eventos relacionados