Galicia e os normandos nos Luns do Ateneo

A charla de López permitirá afondar nun dos momentos da historia medieval de Galicia máis interesantes.  O catedrático falará dos vínculos entre Galicia e os normandos, unha conexión de grande relevancia para comprender a evolución política e cultural do territorio.

A conferencia tratará o impacto das incursións normandas na Galicia medieval, analizándoo dende unha perspectiva histórica que pon en valor as relacións entre a costa galega e este pobo europeo.

A través deste percorrido, López Alsina achegará a influencia que estas interaccións tiveron tanto na estrutura defensiva e urbana das vilas costeiras galegas como na evolución das relacións entre o Reino de Galicia e as potencias atlánticas.

Fernando López Alsina é un recoñecido especialista en Historia Medieval cunha longa traxectoria de investigación enfocada nas cidades galegas e o Camiño de Santiago. A súa tese de doutoramento, centrada na Compostela medieval, é unha referencia fundamental no estudo da evolución urbana. Entre os seus proxectos destacan «Las ciudades y los espacios urbanos en Galicia» e «La organización parroquial en Galicia entre los siglos VI-XVI». A súa labor investigadora, amplamente recoñecida dentro e fóra de España, fai desta conferencia unha oportunidade única para coñecer máis sobre a historia medieval galega.

Ver en Lindeiros